ഉറൂബ്‌ - മനുഷ്യസ്‌നേഹത്തിന്റെ
ഇതിഹാസകാരന്‍
മലയാളത്തിലെ നോവലിന്റെയും ചെറുകഥയുടെയും ചരിത്രത്തില്‍ അനശ്വരസംഭാവനകള്‍ നല്‍കിയ എഴുത്തുകാരനാണ്‌ ഉറൂബ്‌ (പി.സി. കുട്ടിക്കൃഷ്‌ണന്‍). ചെറുകഥാ പ്രസ്ഥാനത്തില്‍ രണ്ടാംഘട്ടത്തിന്റെ പ്രതിനിധിയാണ്‌ അദ്ദേഹം. ജീവിതത്തെ യാഥാര്‍ത്ഥ്യബോധത്തോടെ നോക്കിക്കാണുന്ന ഇൗ എഴുത്തുകാരന്‍ സവിശേഷമായ ജീവിതദര്‍ശനത്തിനുടമയാണ്‌. മനുഷ്യജീവിതത്തിന്റെ മഹത്ത്വവും `മര്‍ത്യന്‍ സുന്ദരനാണ്‌' എന്ന ദര്‍ശനവുമാണ്‌ ഉറൂബിന്റെ കൃതികളുടെ അടിസ്ഥാനം. സുന്ദരികളും സുന്ദരന്മാരുമാണ്‌ അദ്ദേഹത്തിന്റെ കഥാപാത്രങ്ങള്‍. പുറമെ ദുഷ്ടന്മാരെന്ന്‌ തോന്നുന്ന കഥാപാത്രങ്ങളുടെയുള്ളിലും നന്മയുടെ ഉറവകള്‍ കണ്ടെത്താന്‍ ഉറൂബ്‌ ശ്രമിക്കുന്നു.
മനുഷ്യസ്‌നേഹമാണ്‌ ഉറൂബിന്റെ ദര്‍ശനത്തിന്റെ കാതല്‍. ചെറുകഥകളിലൂടെ മനുഷ്യജീവിതത്തിന്റെ സൂക്ഷ്‌മചിത്രങ്ങള്‍ അവതരിപ്പിക്കുന്ന അദ്ദേഹം നോവലുകളിലൂടെ മനുഷ്യജീവിതമെന്ന അതിവിശാലമായ സമുദ്രത്തിന്റെ ആന്തരാര്‍ത്ഥങ്ങള്‍ അന്വേഷിക്കുന്നു. കേരളചരിത്രവും സംസ്‌കാരവും ഭാഷയും ചേതോഹരമായി സമ്മേളിക്കുന്ന സുന്ദരമായ ഭൂഭാഗദൃശ്യങ്ങളാണ്‌ ഉറൂബിന്റെ കൃതികള്‍ തുറന്നിടുന്നത്‌. സമഗ്രമായ മാനവദര്‍ശനമാണ്‌ അദ്ദേഹത്തിന്റെ എല്ലാ കൃതികളുടെയും ശക്തികേന്ദ്രം. ബാഹ്യലോകത്തെ സൂക്ഷ്‌മമായി ചിത്രീകരിക്കാന്‍ കഴിയുന്നതുപോലെ തന്നെ മനുഷ്യമനസ്സിന്റെ ആഴങ്ങളും ആവിഷ്‌കരിക്കാന്‍ ഉറൂബിന്‌ കഴിഞ്ഞിട്ടുണ്ട്‌. കഥാപാത്രങ്ങളുടെ മാനസിക പ്രക്രിയകള്‍ ആലേഖനം ചെയ്യാന്‍ അദ്ദേഹം ശ്രമിക്കുന്നു. മനുഷ്യമനസ്സിനുള്ളിലേക്ക്‌ കടന്നുചെല്ലുന്ന ഇൗ എഴുത്തുകാരന്‍ ദേശത്തിന്റെ കഥകളോടൊപ്പം മനുഷ്യമനസ്സിന്റെ കഥകളും പറഞ്ഞുതരുന്നു.
No comments:
Post a Comment